Transfer pəncərəsinin sonunadək heyətinə hücumçu qatmağa çalışan "Qalatasaray" hərəkətə keçib.
Fanat.Az xəbər verir ki, İstanbul klubu Moskva "Spartak"ının forvardı Luis Adrianonun keçidini həll etməyə çalışır. Rusiya mediasının məlumatına görə, "sarı-qırmızılılar" Moskva klubuna 6 milyon avro təklif edib. Ruslar isə 10 milyon avro istəyir. Danışıqlar davam edir.
Qeyd edək ki, karyerasına Braziliyanın "İnternasional" klubunda başlayan Adriano 2007-ci ildə 3 milyon avroya transfer olunduğu Donetsk "Şaxtyor"unda 8 il çıxış edib. Bu müddətdə Ukrayna Premyer Liqasının (6 dəfə), ölkə kubokunun (4), Super Kubokunun (5) və Avropa Liqasının (1) qalibi olub. 2015-ci ildə "Milan" onu 8 milyon avro qarşılığında heyətinə qatıb. Hücumçu 2017-ci ilin qışında "Spartak"a keçib. Cari mövsümdə 20 rəsmi oyuna çıxan Adriano 5 qol vurub və 4 məhsuldar ötürmə edib. O, 2014-2015-ci illərdə Braziliya millisinə dəvət alıb (4 oyun).