Polşada keçirilmiş “Golden Anteaters-2018” Lüblin kinofestivalının qalibləri bəlli olub.

AZƏRTAC xəbər verir ki, 8 tammetrajlı və 128 qısametrajlı filmin iştirak etdiyi festivalda azərbaycanlı rejissor İlqar Nəcəfin çəkdiyi “Nar bağı” filmi yüksək mükafata layiq görülüb. Tammetrajlı filmlər arasında Qran-Pri qazanmış film 2017-ci ildə çəkilib.

Filmin quruluşçu rejissoru İlqar Nəcəf, ssenari müəllifləri Asif Rüstəmov, İlqar Nəcəf, Roelof Jan Minneboo, quruluşçu operatoru Ayhan Salar, quruluşçu rəssamı Rafiq Nəsirov, bəstəkarı Firudin Allahverdi, icraçı prodüseri Akif Əliyev, prodüserləri Müşfiq Hətəmov və İlqar Nəcəfdir.

Rolları Qurban İsmayılov, İlahə Həsənova, Səmimi Fərhad, Həsən Ağayev, Rövşən Kərimduxt və digərləri canlandırıblar.

Lüblin kinofestivalında qalib gələn filmdə əsas mövzu adi Azərbaycan ailəsinin həyatı, onların yaşadığı güclü emosional hadisələrdir.

Filmin dünya premyerası Çexiyanın “Karlovı Varı” Beynəlxalq film festivalının “Qərbin Şərqi” müsabiqə proqramı çərçivəsində keçirilib.

Azərbaycandan “Xarici dildə ən yaxşı film”ə görə Oskar mükafatına təqdim olunub.